मनसुनी वायुको प्रभाव : अधिकांश स्थानमा वर्षा

भदौ २१, काठमाडौं  । मनसुनी वायुको प्रभावका कारण देशभर अधिकांश स्थानमा वर्षा भएको छ । मंगलवार साँझसम्म पानी पर्ने छ ।

पश्चिम बंगालको खाडीमा अवस्थित न्यूनचापीय मनसुनको साथै स्थानीय वायुको प्रभावले मनसुन सक्रिय भई देशको अधिकांश स्थानमा वर्षा भएको जल तथा मौसम विज्ञान विभागका वरिष्ठ मौसमविद् मिनकुमार अर्यालले जानकारी दिए । ‘उक्त प्रणालीको प्रभाव मंगलवार बेलुकासम्म कायम रहने र बुधवारदेखि मौसममा सुधार हुनेछ’, उनले भने, ‘स्थानीय वायुको प्रभावले राति र बिहानपख बढी वर्षा हुने गरेको छ ।’

हाल देशभर सामान्यदेखि पूर्णतया बदली रही प्रदेश १, प्रदेश २, वाग्मती, गण्डकी र लुम्बिनी प्रदेशका धेरै स्थानमा तथा बाँकी प्रदेशका केही स्थानमा मेघगर्जनसहित हल्कादेखि मध्यम वर्षा भइरहेको छ ।

राति देशभर सामान्यदेखि पूर्ण बदली रही धेरै स्थानमा हल्कादेखि मध्यम वर्षाको सम्भावनाका साथै गण्डकी, कर्णाली र सुदूरपश्चिम प्रदेशका केही स्थान तथा प्रदेश १, वाग्मती र लुम्बिनी प्रदेशका केही स्थानमा मेघगर्जनसहित भारी वर्षाको सम्भावना रहेको मौसम पूर्वानुमान महाशाखाले जानकारी दिएको छ ।

गए रातिको अविरल वर्षाका कारण काठमाडौं उपत्यकाका विभिन्न स्थान डुबानमा परेका छन् । काठमाडौं उपत्यकामा १२१ दशमलव ५ मिलिमिटर वर्षा भएको महाशाखाले जानकारी दिएको छ । रासस